ஜப்பான் அரசாங்கத்தின் நிதி உதவியின் கீழ் UNWOMEN மற்றும் Chrysalis நிறுவனங்கள் ஊடாக மன்னாரில் பெண் தொழில் முயற்சியாளர்களுக்கு வியாபார விருத்திக்கான உபகரணங்கள் வழங்கி வைக்கப்பட்டது.
‘பெண்களின் பொருளாதாரத்தை வலுப்படுத்தல் மற்றும் முயற்சியாண்மையை மேம்படுத்துதல்’ எனும் தொனிப்பொருளில் மேற்படி நிகழ்வு நேற்று (21) மன்னார் நகர மண்டபத்தில் கிறிசலிஸ் நிறுவனத்தின் ஏற்பாட்டில் இடம்பெற்றிருந்தது.
இதன் போது வியாபார விருத்தி தொடர்பான பயிற்சிகளை நிறைவு செய்தவர்களுக்கு சான்றிதழ்கள் வழங்கி வைக்கப்பட்டதோடு, மன்னார் மாவட்டத்தில் உள்ள பெண் தொழில் முயற்சியாளர்களினால் தயாரிக்கப்பட்ட பல்வேறுபட்ட உற்பத்திப் பொருட்கள் (உணவு, கலை பொருட்கள், ஆடை வகைகள்) என்பன காட்சிப்படுத்தப்பட்டதுடன் விற்பனை சந்தையும் இடம் பெற்றது.
அதே நேரம் பெண்களின் வியாபார முயற்சிகளை ஊக்குவிக்கும் வகையில் ஜப்பான் அரசாங்கத்தின் நிதியுதவியுடன் தெரிவு செய்யப்பட்ட பெண்களுக்கான பல்வேறு தொழில் விருத்திக்கான உபகரணங்கள் (தையல் இயந்திரம், குளிர்சாதனப்பெட்டி, dehydrator போன்றவை வைபவ ரீதியாக கையளிக்கப்பட்டமை குறிப்பிடத்தக்கது.
குறித்த நிகழ்வில் பிரதம விருந்தினராக ஜப்பான் தூதரகத்தின் அமைச்சர் மற்றும் பிரதி பிரதானி கமோஷிடா ( Mr.Kamoshida, Minister / Deputy head of mission embassy of Japan to Sri Lanka) மற்றும் சிறப்பு விருந்தினர்களாக மன்னார் மாவட்ட அரசாங்க அதிபர் திரு.கனகேஸ்வரன் உள்ளடங்களாக பிரதேச செயலாளர்கள், UN WOMEN மற்றும் Chrysalis அமைப்பின் அதிகாரிகள், பெண்கள் அமைப்பின் பிரதிநிதிகள் மற்றும் பெண் தொழில் முயற்சியாளர்கள் என பலர் கலந்து கொண்டனர்.